Европската Унија и партнерите од регионот на Западен Балкан официјално усвоија заедничка декларација со која се зајакнува соработката во областа на научните истражувања и иновациите. Целта на овој документ е да се забрза и поддржи интеграцијата на земјите од регионот кон Европската Унија, соопштија претставниците на Европската комисија.
Документот дефинира заедничка рамка и амбиција за унапредување на кариерите на истражувачите, развој на иновативните екосистеми и подготовка на нов сеопфатен заеднички акциски план меѓу Европската Унија и шесте партнери од Западен Балкан: Албанија, Босна и Херцеговина, Косово, Црна Гора, Северна Македонија и Србија.
Комесарката за проширување на ЕУ, Марта Кос, потенцираше дека поврзувањето во секторот на истражувањето и иновациите претставува успешен пример за постепена интеграција на земјите кои имаат статус на кандидати за полноправно членство. Европската комесарка за стартапи, истражување и иновации, Екатерина Захариева, нагласи дека декларацијата отвора целосно нова етапа во меѓусебните односи.
„Заедно ќе развиеме конкретни мерки за зајакнување на извонредноста во истражувањето, поддршка на иновациите и зближување на регионот на ЕУ“, рече Захариева.
Усогласувањето на декларацијата беше заокружено на министерскиот состанок на Управувачката платформа за истражување и иновации за Западен Балкан, кој се одржа на 22 октомври во Брисел. Ова тело уште од 2006 година континуирано ги обединува Европската комисија, официјалните претставници на шесте западнобалкански партнери, земјите членки на ЕУ и пошироката стручна и научна заедница.
Низ двете децении на постоење, платформата овозможи продлабочување на довербата и целосно вклучување на земјите од регионот во истражувачките механизми на Брисел. Ова долгорочно партнерство веќе дава видливи резултати, со оглед на тоа што земјите од Западен Балкан преку програмата „Хоризонт Европа“ досега имаат обезбедено околу 237 милиони евра, учествувајќи во повеќе од илјада регионални проекти.