Пожарите во Лос Анџелес уништија над 10.000 згради, а бројот на загинати се искачи на 11.

Горат над пет пожари во моментов

Според информациите од Противпожарната служба, во метрополата во моментов горат 5 пожари со вкупна површина од над 14.000 хектари. Најголемите меѓу нив се уште не се под контрола. Локалните власти предупредија дека точниот број на загинати ќе остане нејасен уште некое време, бидејќи истражителите сè уште не можат да стигнат до опожарените области.

Намерно подметнување пожари и грабежи по куќите

Полицијата во Лос Анџелес веќе уапсила маж осомничен дека намерно запалил шума, што довело до еден од пожарите – „Кенет“. Според високиот офицер Чарлс Динсал, виновникот, 30-годишен бездомник, бил фатен од граѓаните. Осомничениот бил лоциран во областа Вудленд Хилс.

Покрај тоа, полицијата приведе не помалку од 20 лица под сомнение за грабеж. Во врска со зголемените случаи на кражби на имот од напуштени домови, властите имаат намера да воведат полициски час во областа на евакуираните куќи.

Бројот на луѓе евакуирани од загрозените области се искачи на над 130.000.

Бајден: Најлошите во историјата на Калифорнија

Американскиот претседател Џо Бајден рече дека овие пожари се најлошите во историјата на Калифорнија и вети дополнителни федерални средства и ресурси за помош на државата.

„Ова е најраспространетиот и најразорниот пожар во историјата на Калифорнија“, рече Бајден додека свика специјален состанок во Белата куќа. Тој нагласи дека жителите на Лос Анџелес „живеат кошмар“ и ги поздрави пожарникарите како „херои“.