Репрезентацијата на Парагвај ја приреди првата сензација на Светското првенство. Парагвајците ја елиминираа Германија во 1/16 финалето. Натпреварот заврши 1:1 по 120 минути, а по шест пенал серии, Парагвај славеше со 4:3.
Германците доживеаа дебакл на третото Светско првенство по ред, бидејќи беа елиминирани во групата во претходните две, а сега во првата нокаут рунда, од објективно послаба селекција. Ова е воедно прв пат „панцерите“ да загубат пенал серија на СП.
Парагвај нема квалитет каков што има Германија, но Парагвајците во Бостон, имаа големо срце и желба да му го загорчат животот на противникот.
Имаа јасна цел, топката му ја препуштија на противникот, а своите шанси ги бараа од контранападите.
Германија во првиот дел доминираше во поседот но не направи ништо конкретно пред голот на извонредниот голман, Хил.
За разлика од германците, Парагвај постигна гол од првата сериозна акција, во 42-та минута стрелец беше Енсисо.
Германците се вратија во мечот во 54-та минута со голот на Хаверц. До крајот на регуларниот тек напаѓаа, но не можеа да го пробијат блокот на противникот.
Во продолженијата Германија постигна гол, во 102-та минута преку Та, но по асистенција на ВАР собата, судијата го поништи, бидејќи Антон го фаулираше голманот.
До крајот на продолженијата Германците имаа две добри шанси, два пати се истакна Хил.
Пенал серијата беше исклучително драматична. Откако, Хил ги одбрани ударите на Хаверц во првата и Волтемаде во четвртата серија, Парагвајците не реализираа два пати за победа, Санабрија шутираше крај голот, а Нојер го одбрани ударот на Баблубена.
Во шестата, Та шутираше над голот, а Канале, еден од хероите на Парагвај, стави точка на мечот.
Парагвај во осминафиналето ќе игра против победникот од натпреварот меѓу Франција и Шведска.
Фудбалската репрезентација на Мароко избори пласман во осминафиналето на Светското првенство, откако по подобро изведување пенали со 3:2 ја совлада Холандија. По 90 минути игра и продолженијата резултатот беше 1:1.
Холандија поведе во 72. минута преку Коди Гакпо, кој ја круниса одличната акција започната од голманот Барт Вербруген, а продолжена од Вут Вегхорст и Крисенсио Самервил.
Мароко долго ја бараше шансата за израмнување, а до неа стигна во првата минута од судиското продолжение на второто полувреме.
Шемседин Талби испрати прецизен центаршут, а Иса Диоп со удар со глава го совлада Вербруген за 1:1 и го однесе натпреварот во продолженија.
Во дополнителните 30 минути немаше голови, иако Мароко беше поопасниот противник и создаде неколку добри можности, па победникот беше решен по изведување пенали.
Во пенал-серијата за Мароко прецизни беа Суфијан Рахими, Шемседин Талби и Исмаел Саибари, чиј погодок го донесе големото славје. Неуспешни беа Нил Ел Ајнауи, кој ја погоди пречката, и Ашраф Хакими, чиј удар заврши во стативата.
За Холандија погодија Теун Копмајнерс и Вут Вегхорст, додека Џастин Клајверт ја погоди стативата, Квинтен Тимбер шутираше покрај голот, а голманот Јасин Буну го одбрани решавачкиот удар на Крисенсио Самервил.
Во осминафиналето Мароко ќе игра против Канада, која претходно ја елиминираше Јужна Африка.