Групна физичка пресметка во која учествувале шест лица се случила во непосредна близина на полициската станица во Кочани. Четворица од учесниците биле приведени, а надлежните ќе го испитуваат и постапувањето на полициските службеници.
Инцидентот се случил вчера, 15 август, околу 19:15 часот на улицата „Тодосија Паунов“ во Кочани. Според информациите од полицијата, по претходна расправија дошло до нарушување на јавниот ред и мир со физичка пресметка во која учествувале шест лица.
Во врска со случајот биле приведени Ж.В. (22), Ј.В. (19) и М.В. (47), сите од Кочани, како и И.А. (46) од селото Баница, Струмичко.
По преземените мерки и целосното документирање на настанот, против приведените лица биле поднесени соодветни поднесоци.
Случајот, сепак, не завршува со постапувањето против учесниците во тепачката. За целосно расчистување на околностите и утврдување дали имало евентуални пропусти во постапувањето на полицијата, во истрагата ќе бидат вклучени Одделот за внатрешна контрола, криминалистички истраги и професионални стандарди и Одделот за униформирана полиција.
Надлежните треба да утврдат што точно се случувало за време на инцидентот и дали при постапувањето на полициските службеници имало пропусти.