Организаторите на релито Дакар соопштија дека 49. издание на ова престижно натпреварување ќе започне во Португалија и во најголем дел ќе се вози на територијата на Мароко. Настанот е официјално закажан да се одржи од 9 до 23 јануари следната година.
Првично планираната рута низ Саудиска Арабија е целосно откажана поради конфликтот на Блискиот Исток. Организаторите ја презентираа новата траса која ќе биде со вкупна должина од 7.824 километри низ повеќе тешки предели.
Со оваа одлука, Дакар како најголема светска офроуд трка се враќа на африканскиот континент за прв пат по две децении. Првата етапа ќе започне во португалскиот регион Алгарве, а преостанатите 11 етапи се предвидени низ Мароко, со завршница и крајна цел во градот Маракеш.
Првото издание на ова познато натпреварување се одржа во 1979 година, кога караванот се движеше на релација од Париз до главниот град на Сенегал, Дакар. Во 2008 година, трката беше откажана во последен момент поради сериозни безбедносни ризици во регионот на Северна Африка.
По откажувањето, натпреварувањето се пресели и со години се организираше во Јужна Америка, додека од 2020 година рутите беа поставени низ пустините на Саудиска Арабија. Според најавите од страна на организаторите, караванот на релито се очекува повторно да се врати во Саудиска Арабија во 2028 година.