Илјадници граѓани излегоа на протести во повеќе градови низ Франција, изразувајќи го незадоволството од растот на трошоците за живот и владините политики. Француското Министерство за внатрешни работи процени дека на собирите учествувале околу 146.000 луѓе, додека младинските синдикални организации соопштија бројка од 250.000 демонстранти. На протестниот марш во Париз учествувале околу 46.000 лица според полицијата, а организаторите тврдат дека на улиците излегле 75.000 луѓе.
Главниот протестен марш во престолнината се одвиваше меѓу плоштадите Република и Нација, со масовно учество на студенти, средношколци, синдикати и други граѓани под мотото „За младите и против високите трошоци за живот“. Учесниците бараа подобрување на економските услови, финансиска поддршка за младите генерации и итни мерки против бранот поскапувања.
Во текот на попладневните часови на плоштадот Нација избија судири меѓу безбедносните сили и дел од демонстрантите, поради што полицијата употреби специјални средства за растерување на толпата. Полициските извештаи наведуваат дека група од околу 200 лица директно се судрила со органите на редот, при што биле запалени и неколку канти за отпадоци.
Паралелно со овој марш, движењето „Жолти елеци“ се обиде да организира собир на плоштадот Конкорд во Париз наспроти забраната од властите. Собирот беше малуброен, а полицијата вршеше строга контрола и им изрекуваше казни на присутните поради учество на неовластен јавен собир.
Протестни собири беа организирани и во други француски центри како Лион, Лил, Марсеј, Бордо и Тулуза, каде што дел од локалните власти воведоа забрана за собири во централните градски подрачја.
Овие протести претставуваат четврти последователен викенд на граѓанска мобилизација во Франција поради зголемените социјални и економски тензии. За време на националниот ден на акција во четвртокот учествуваа меѓу 575.000 и 1,6 милиони луѓе, при што студентските барања прераснаа во протести за повисоки плати, пензии, образование и подобри услови во здравството.
Властите ангажираа околу 70.000 полицајци и жандарми со цел обезбедување на редот и мирот низ целата земја. Притисокот врз владата доаѓа на пет месеци пред претседателските избори во услови на зголемена поддршка за десницата, претворајќи ги протестите во сериозен политички предизвик.