Царинската управа со највисок напредок според Европската комисија
Во најновиот извештај за напредокот на државата, Европската комисија нотира високо ниво на напредок во областа Царинска унија, со која раководи Царинската управа.
Раст на приходите и унапредување на капацитетите
„Високото ниво на напредок, нотирано од Европската комисија, е уште еден цврст доказ дека Царинската управа спроведува значителни реформски мерки и политики коишто треба да овозможат забрзување на интеграцијата на нашата држава во единствениот пазар на ЕУ“, изјави директорот Бобан Николовски. Во извештајот се истакнува дека вкупните приходи во 2024 година се зголемени за 6,3 проценти во однос на 2023, надминувајќи две милијарди евра.
Модерни ИКТ системи и борба против корупцијата
Комисијата го нагласува напредокот во усогласување на ИКТ системите – пуштањето во употреба на новиот компјутеризиран транзитен систем фаза 5, развојот на ЕОРИ системот и дигиталниот потпис. Во извештајот се споменува и усвоената Стратегија за интегритет и борба против корупција 2024–2027, која содржи 22 таргетирани мерки за превенција.
Успеси во заштита на интелектуална сопственост и регионална соработка
Царинската управа е пофалена и за резултатите во заштита на правата од интелектуална сопственост – во 2024 година се запленети 147.525 стоки во 73 случаи на сомневање за повреда. Европската комисија го поздравува и потпишувањето на Меморандумот за соработка со Царинската управа на Црна Гора, насочен кон спречување измами и олеснување на легалната трговија меѓу двете земји.