49-годишниот Абдул Јашари од скопски Чаир, познат и како командант Абу Ал Албани со години дејствува во Сирија како лидер на екстремистичката група „Џемати Албан“. Тој неодамна бил назначен за министер во новата сириска влада. Оваа информација ја објави и агенцијата Ројтерс, повикувајќи се на извори од сириската влада.
Поврзаност со случајот „Монструм“
Најновите вести за Јашари повторно го отворија прашањето за неговото евентуално присуство во Македонија во 2012 година. Тогаш се случи масакрот кај Смиљковско Езеро, при што беа убиени четири момчиња и рибар.
Неделникот „Фокус“ уште пред неколку години пишуваше дека Јашари бил споменуван во судењето за случајот „Монструм“. Иако неговата улога во злосторството никогаш не беше целосно разјаснета, постоеја сомнежи дека тој бил присутен на местото на настанот.
Загрозениот сведок „Е1“ во текот на истрагата сведочел дека, освен неколку од обвинетите, на локацијата го видел и Јашари. Сведокот препознал четири лица на фотографии, од кои едниот бил идентификуван како Абдул Јашари. Сепак, тој никогаш не беше обвинет или повикан како сведок во случајот, и покрај инсистирањето на одбраната.
Обиди за повторно истражување
Подоцна, кога предметот го презеде Специјалното јавно обвинителство (СЈО), се правеле напори за дополнително истражување на потенцијалната улога на Јашари во случајот „Монструм“. Но, освен сведочењето на „Е1“, не биле пронајдени дополнителни докази кои би го поврзале со злосторството.
На американската „црна листа“
Во последниве години, Јашари беше ставен на американската „црна листа“, со што му беа замрзнати средствата и му беше забрането патување во одредени земји. Останува нејасно како и каде тој дејствувал во последната деценија и каква е неговата моментална улога во новата сириска влада.
Дали Јашари навистина бил присутен во Македонија во 2012 година и имал улога во масакрот кај Смиљковско Езеро останува мистерија која до денес не е разрешена.