По усвојувањето на новиот Закон за игрите на среќа, продолжува неговата имплементација и доуредување преку донесување на потребните правилници. Еден од нив е Правилникот за утврдување на репутацијата, интегритетот и потеклото на средствата за приредување игри на среќа, информира министерката за финансии Гордана Димитриеска-Кочоска, а пренесе Експрес.
Ќе се утврдува репутацијата на барателите на лиценца
Со правилникот детално ќе се пропише потребната документација за потврдување на репутацијата на правните и физичките лица кои поднесуваат барање за лиценца за казино, обложувалница, автомат клуб или томбола од затворен тип. Документацијата, меѓу другото, ќе се однесува и на изречени санкции за забрана за вршење професија, како и на изречена забрана за приредување игри на среќа и други околности значајни за нивното учество во оваа дејност.
Правилникот ги претвора законските принципи во конкретни правила
Димитриеска-Кочоска оценува дека правилникот претставува важен чекор бидејќи законските принципи ги претвора во конкретни правила, процедури и критериуми што ќе можат да се применуваат во пракса. Министерството за финансии, како што посочува, работи и на подготовка и донесување на останатите правилници потребни за целосна имплементација на Законот.
Целта е поголема заштита и поефикасен систем
Според министерката, прецизната регулатива е основа за јасни и фер правила за работа, вклучително и во индустријата на игрите на среќа. Таа нагласува дека вистинскиот резултат доаѓа со доследната имплементација на законските решенија, што треба да придонесе за поголема заштита на граѓаните и поефикасен систем. Новиот Закон за игрите на среќа и за забавните игри беше донесен на крајот на јуни, со повеќе новини насочени кон поголема заштита на граѓаните, посилна контрола и поодговорно работење во индустријата.