Украинскиот претседател Володимир Зеленски изјави дека неговата земја ќе ги запре нападите врз руските рафинерии, како што побара американскиот претседател Доналд Трамп, доколку Вашингтон му обезбеди на Киев ракети-пресретнувачи „Патриот“.
Зеленски изјави за „Фокс њуз“ дека имал неколку различни разговори со американскиот претседател и неговиот тим токму на таа тема.
„Рековме: Ако сакате да не напаѓаме руски рафинерии, тогаш тие (Русите) не смеат да го нападнат нашиот енергетски систем. Друга опција е: Дајте ни ракети „Патриот“, вели Зеленски.
Тој појасни дека доколку Вашингтон ги обезбеди тие системи за противвоздушна одбрана, што служат за пресретнување руски дронови и ракети во рок од еден месец, Киев веднаш ќе ги запре сите напади врз рафинериите во Русија.
На новинарско прашање дали постои страв дека ваквиот став може да се протолкува како обид за вршење притисок врз претседателот на САД, Зеленски даде дециден негативен одговор.
„Не ме загрижува изнесувањето вистина меѓу партнерите“, рече Зеленски.
Стејт департментот во петокот објави дека администрацијата на Трамп одобрила продажба на 500 ракети „Патриот“ на Украина.
И покрај ваквата одлука, украинскиот претседател упати јавно предупредување дека испораките на вооружувањето би можеле да траат со години, додека воените структури во Киев веќе со недели алармираат за критично исцрпување на тековните одбранбени залихи.