Француската Национална жандармерија пријави сериозен напад врз припадник на полицијата за време на протестите во земјата. Полицаецот се здобил со тешки изгореници откако му се запалила ногата.

Жандармеријата соопшти дека на протестите се забележува „неприфатливо насилство“ врз органите на редот. Воедно, на социјалната мрежа Икс (X) објави фотографија и видео од нападот, на кои се гледа моментот кога на полицаецот му се запалува ногата.

Инцидентот предизвика реакции и кај политичките претставници. Џордано Бардела, претседател на крајнодесничарската партија Национален собир, го опиша запаливиот уред како оружје „наменето да убива“. Тој побара сторителите да добијат повеќегодишни затворски казни.

Во Франција веќе неколку дена се одржуваат протести поради високите трошоци за живот и состојбата во образованието. Во текот на протестите ескалираше и насилството врз припадниците на органите на редот.