На валутните пазари, вредноста на доларот во однос на кошницата валути повторно порасна минатата недела, осми пат по ред, бидејќи ФЕД може дополнително да ги зголеми каматните стапки или да ги задржи на покачени нивоа подолго од очекуваното. Индексот на доларот, кој ја следи вредноста на САД во однос на шесте најважни светски валути, се зголеми за 0,7 отсто минатата недела на 105,05 поени, највисоко ниво во последните шест месеци. Истовремено, доларот зајакна за 0,75 отсто во однос на европската валута, па цената на еврото се лизна на 1,0700 долари, пренесува А1он.
Курсот на доларот порасна и во однос на јапонската валута, за 1,1 отсто, на 147,80 јени. Осумнеделното зајакнување на доларот не е забележано од 2014 година, благодарение на податоците кои покажуваат дека американската економија и пазарот на труд остануваат силни.
Активноста на американскиот услужен сектор порасна повеќе од очекуваното во август, додека првичните барања за невработеност во САД паднаа на 216.000 минатата недела, што е најниско ниво од февруари.
Овие податоци ги поттикнаа шпекулациите дека американската централна банка дополнително ќе ги зголеми каматните стапки, имајќи предвид дека потрошувачката, растот на платите и инфлацијата не се „ладат“ доволно. Сепак, огромното мнозинство аналитичари и натаму очекуваат дека ФЕД ќе ги остави каматните стапки непроменети на состанокот во септември, а повеќето од нив веруваат и дека нема дополнително да ги зголемат ниту во ноември.
Сепак, поради отпорноста на економијата, како и покачената инфлација, сè поверојатно е дека ФЕД нема да започне со намалување на каматните стапки веднаш како што претходно се очекуваше. Еврото, пак, ослабе осма недела по ред во однос на доларот.
Иако инфлацијата е се уште висока во еврозоната, пазарот на пари проценува дека има речиси 80 отсто шанси Европската централна банка да не ги зголеми каматните стапки на септемвриската сесија бидејќи на економијата на еврозоната и се заканува рецесија.