Британски и француски борбени авиони изведоа заеднички маневри над Медитеранот во рамките на нивната прва заедничка вежба со воздухопловните сили. Сојузниците претходно постигнаа договор за зајакнување на соработката на нивните нуклеарни арсенали, што претставува директен одговор на растечките безбедносни закани во Европа.
Во воените маневри учествуваа авиони од типот „Рафал“ и „Тајфун“, изведувајќи сложени тактички операции во воздушниот простор. Француската министерка за вооружени сили ја нагласи стратешката важност на заедничкото дејствување на двете нуклеарни сили на европскиот континент.
„Независните нуклеарни сили не ја исклучуваат координацијата. Нашата нуклеарна соработка со Обединетото Кралство продолжува да се продлабочува: Во вторник вечерта, британските ’Тајфуни’ учествуваа за прв пат во француска нуклеарна вежба со борбени авиони ’Рафал’“, нагласи Вотрин.
Борбените летала полетаа од воздухопловната база Сен-Дизје во североисточниот дел на Франција, каде што на француските ескадрили им се придружија британските летала на Кралските воздухопловни сили. Заедно симулираа прецизен нуклеарен удар во рамките на операцијата наречена „Рами“, потврди Министерството за вооружени сили на Франција.
„Во еден сѐ поопасен свет, нашите противници не смеат да се сомневаат: Обединетото Кралство и Франција стојат заедно во својата посветеност на европската безбедност и одвраќањето што со генерации го зачува мирот“, додаде Стритинг.
Двете земји ја истакнаа посветеноста кон одржувањето на мирот преку силни капацитети за одвраќање, најавувајќи натамошно продлабочување на воената координација и интеграција во справувањето со глобалните безбедносни предизвици.