Француските власти најавија масовно присуство на безбедносните сили за време на новите протести закажани за в сабота. Францускиот премиер Себастијан Лекорну призна дека безбедносните служби на претходните собири биле недоволно подготвени за брза реакција.
Премиерот истакна дека полицијата за време на немирите на 17 октомври делувала премногу статично и со недостаток на мобилност, поради што министерот за внатрешни работи Лоран Нуњез веќе доставил нови оперативни насоки до сите полициски префектури.
Нуњез соопшти дека за време на протестите закажани за 24 октомври ќе бидат ангажирани и воени сили кои ќе послужат како засилување за безбедносниот апарат.
„Ќе ги распоредиме силите Сентинел како замена за внатрешните безбедносни сили, главно за да ги ослободиме полицијата и жандармеријата во нивната мисија за одржување на редот“, посочи Нуњез.
Единицата Сентинел претставува специјализирана антитерористичка формација во составот на француската армија, воспоставена во јануари 2015 година по одлука на тогашниот претседател Франсоа Оланд, веднаш по терористичките напади врз редакцијата на магазинот „Шарли Ебдо“. Нивната примарна задача е континуирано обезбедување на критични и чувствителни локации, како синагоги, цркви, училишта, железнички јазли, аеродроми и популарни туристички точки.
Француската влада честопати ги мобилизира овие воени капацитети при масовни улични тензии и протести, со цел редовните полициски сили да добијат целосна слобода за одржување на јавниот ред и мир.
Паралелно со овие мерки во Франција, слична состојба со масовно ангажирање на безбедносните сили се одвива и во Италија. Италијанскиот вицепремиер Матео Салвини соопшти дека по насилните протести во Милано предизвикани од поскапувањето на животот и лошите јавни услуги, во градот се испратени дополнителни 500 војници.
Италијанските безбедносни служби потврдија дека привеле 271 лице за време на неделните немири во Милано, на кои им претходеа жестоки судири со органите на редот и во други северни италијански градови, меѓу кои Болоња, Бреша, Бергамо и Торино.