Ако полициски службеник забележи дека зборувате на мобилен телефон или слушате музика на слушалки додека поминувате на пешачки премин, управувате мопед, велосипед или електричен тротинет, ќе следи парична казна од 40 до 50 евра, пишува Канал 5.
Ова е предвидено во измените на Законот за безбедност на сообраќајот на патиштата, кои сè уште се во процедура и се разгледуваат во Законодавно-правната комисија на Собранието. Со нив се предвидуваат санкции и за управување трактор со телефон во рака, бидејќи тоа ја намалува способноста за навремена реакција и сигурно управување.
Дел од граѓаните ги поддржуваат овие предлози. Тие сметаат дека сообраќајниот хаос може да се регулира единствено „ако државата удри по џебот“ и воведе построги казни.
Став за потребата од санкции имаат и експертите. Професорот Никола Крстаноски од Отсекот за сообраќај и транспорт при Техничкиот факултет во Битола посочува дека одамна требало да се воспостави ваква контрола. Тој нагласува дека искуствата од развиените земји покажуваат дека казнената политика е главен пат кон развивање на сообраќајна култура.
Од МВР објаснуваат дека кога законските измени ќе стапат во сила, полициските службеници што патролираат ќе имаат овластување со непосредно забележување да изрекуваат казни на лице место.
Новите измени се дел од пошироката иницијатива „Безбеден град“. Прво ќе почне да се применува во Скопје, Тетово и Куманово, а до средината на 2026 година треба да биде проширена низ целата држава.
Извор: Канал 5