– Не очекуваме силен бран, односно притисок во болниците, но сме спремни да се прифатат пациентите во кој било град, рече Филипче во одговор на новинарски прашања.

Тешко е, рече тој, да се зборува за очекувања, но може да се види од досегашните искуства дека овој бран беше силен и имаше голем број новодијагностицирани пациенти на кои им беше потребно болничко лекување, само во градовите каде е низок опфатот со вакцинација, а во градовите каде тој опфет е повисок „нема гужви во болниците“.

– Сега на територијата на цела држава е во пораст опфат со вакцинација. Сметам дека силен бран не би требало да има, но тоа не значи дека не треба да сме внимателни и треба да ја следиме состојбата. Очигледно дека вакцинацијата го прави своето. Дека има ефект од овој процес е докажано и беше докажано сега во овие градови во кои болниците воопшто не се преоптоварија. И доколку се заразат вакцинирани лица тоа ќе биде со полесна форма на болеста и тоа е нешто што се следи и во другите земји каде е прилично висок опфатот со вакцинација, рече министерот за здравство.

Тој вели дека почетокот на секоја кампања и препорака на одредена мерка го зголемувала бројот на лица кои аплицирале за вакцинација и оти сега интересот за примање прва доза е помал.

– Верувам дека на граѓаните се повеќе им е јасно каков е ефектот од вакцинацијата, а тоа е дека таму и каде има заболени, едноставно болниците не се преоптоваруваат. Со вакцинацијата се постигнуваат две работи – прво се штити сопственото здравје, а потоа и здравствениот систем кој нема да се преоптоварува и ќе може да работат нормално и други специјалности и да не се прават листи на чекање, рече Филипче потенцираќи дека и натаму ќе се работи на потенцирање на важност на вакцинацијата.

Тој додаде дека наскоро ќе почне да се применува нова рестриктивна мерка за влез на одредени објекти и настани, при што ќе може да влегуваат само вакцинирани со две дози, наместо како досега и само со една. Освен тоа, засега не се размислува за други мерки, истакна Филипче, иако тоа не се исклучува.

– Тешко е да се предвиди како ќе се движи состојбата со вирусот. Има различни студии и предвидувања. Во овој момент освен кампањите и рестриктивните мерки, некои земји имаат препораки во некои сектори вакцинацијата да биде задолжителна. Ние засега не размислуваме за тоа, но ништо не е исклучено. Ќе видиме како ќе биде овој следен период, каква ќе биде епидемиолошката состојба, ќе видиме дали овој опфат со вакцина и натаму ќе ги намалува бројките и врз основа на тоа би носеле нови одлуки, рече Филипче.