Јужнокорејското специјално обвинителство побара смртна казна за поранешниот претседател Јун Сук Јол поради организирање бунт и воведување воена состојба во земјата во декември 2024 година. Судскиот процес продолжува пред Вишиот суд во Сеул, кој сè уште не одредил датум за пресудата по жалбата на одбраната на првостепената казна доживотен затвор.
Првостепениот Централен окружен суд во Сеул во февруари пресуди дека поранешниот претседател незаконски ги употребил воените и полициските сили за насилно преземање на законодавната власт, апсење на своите политички опоненти и обид за воспоставување апсолутна лична власт на подолг временски рок.
Жалба на пресудата поднесе и специјалниот обвинител Чо Еун-сук, кој побара изрекување најстрога законска казна со образложение дека потегот на Јун претставувал директна и суштинска закана за уставниот поредок и демократијата.
Кризата ескалираше на 3 декември 2024 година кога Јун ненадејно прогласи вонредна состојба што траеше неколку часа. Пратениците успеаја физички да ја пробијат блокадата поставена пред зградата на Националното собрание во Сеул и на вонредна седница гласаа за укинување на претседателската одлука.
Поранешниот шеф на државата беше официјално отповикан од функцијата во април, по што беше сместен во притвор и против него во моментов се водат шест одделни кривични постапки. Ваквиот развој на настаните предизвика најдлабока општествено-политичка криза во Јужна Кореја во последните неколку децении.
Иако Јужна Кореја бележи серија судски постапки против поранешни претседатели, ниеден од нив досега не бил погубен. Последен претседател кому му била изречена смртна казна беше Чон Ду Хван во 1996 година, но неговата казна подоцна беше преиначена во доживотен затвор, по што беше помилуван пред неговата смрт во 2021 година. По речиси три децении, прашањето за најтешката казна повторно е отворено во јужнокорејското правосудство со случајот против Јун Сук Јол.