Европската комисија подготвува нов пакет мерки што треба да им овозможат на државите и градовите полесно да го ограничат краткорочното изнајмување станови за туристи, како и купувањето недвижен имот што не се користи како главно живеалиште.
Новите правила би се применувале само во области каде што постои докажан притисок врз цените и достапноста на становите. Брисел сака попрецизно да утврди кога локалните и националните власти можат да го ограничат изнајмувањето преку платформи како Airbnb, но и купувањето втор стан или недвижен имот исклучиво како инвестиција.
Цените на становите пораснаа за речиси 65 проценти
Притисокот врз европскиот пазар на недвижности силно порасна во последните години. Според податоците од Европската унија, цените на становите во повеќето европски метрополи се зголемиле за 64,9 проценти помеѓу 2015 и 2025 година, додека кириите се зголемиле за 21,8 проценти во истиот период.
Речиси десет проценти од жителите на урбаните области на Европската унија трошат повеќе од 40 проценти од својот расположлив приход само за домување.
На мета купувањето втор стан
Европската комисија, исто така, разгледува поголем простор за интервенција на националните власти на места каде што недвижностите масовно се купуваат како инвестиција, наместо за домување.
Еден од критериумите би можел да биде односот на цените на недвижностите и приходите на населението. Според документот, се разгледува препорака државите да реагираат таму каде што цените на куќите или становите се најмалку осум пати повисоки од локалните приходи, каде што пораснале во последните десет години и каде што не се очекува подобрување во следните три години.
Исто така, може да отвори простор за ограничување на купувањето недвижен имот што служи исклучиво како втор дом или како инвестиција во области каде што локалното население има сè потешкотии да најде домување.
На Европа ѝ се потребни повеќе од два милиони нови станови годишно
Европската комисија признава дека ограничувањето на Airbnb и купувањето втор дом само по себе нема да ја реши кризата со домувањето. Се проценува дека годишно треба да се градат повеќе од два милиони нови станови за да се ублажи недостатокот на понуда.
Меѓу најголемите проблеми се високите трошоци за изградба, скапото земјиште, ограничувањата во просторното планирање и долгите процедури за добивање дозволи.
Според податоците, на Франција ѝ се потребни околу 518.000 нови станови годишно, а на Германија околу 400.000, додека Холандија треба да добие речиси еден милион нови станбени единици до 2031 година.
Затоа, Европската комисија подготвува посебен пакет за поедноставување на правилата во станбената изградба за 2027 година, што треба да ги намали административните пречки за изградба на нови станови, пишува Euronews.