Можностите за подобрување на здравствената заштита на македонските студенти кои студираат во Словенија биле една од темите на билатералната средба меѓу претставници на фондовите за здравствено осигурување на двете земји. До крајот на 2026 година се планира нова средба за усогласување двојазичен образец за упатување на лекување.
Генералниот директор на Фондот за здравствено осигурување, Златко Перински, учествува на првата заедничка конференција на јавните заводи и фондови за здравствено осигурување од земјите од поранешна Југославија. Конференцијата се одржува во Љубљана, во организација на Заводот за здравствено осигурување на Словенија.
Настанот е насочен кон посилно регионално поврзување на институциите што управуваат со задолжителното здравствено осигурување. Конференцијата отвора и можност за размена на конкретни искуства и решенија за прашања што директно ги засегаат осигурениците.
Во фокусот на разговорите се поефикасното управување со средствата од здравственото осигурување и обезбедувањето поповолни цени за лековите и медицинските помагала. Се разговара и за подобрување на механизмите за контрола и откривање неправилности при наплатата на здравствените услуги.
Посебно внимание е посветено на можностите за посилно меѓународно поврзување на фондовите и заводите за здравствено осигурување преку AIM – Меѓународната асоцијација на здравствени организации. Целта е размена на добри практики и заедничко справување со предизвиците во системите на здравствено осигурување.
На билатералната средба било отворено и прашањето за македонските студенти во Словенија. Претставниците разговарале за можностите за подобрување на нивната здравствена заштита и за обезбедување дополнителни здравствени услуги за време на студискиот престој, во рамките на соработката меѓу двете институции.
Како следен конкретен чекор, до крајот на 2026 година е планирана средба на претставници на ФЗО и на Заводот за здравствено осигурување на Словенија. На неа треба да се работи на усогласување на двојазичниот образец за упатување на лекување.
Истовремено ќе биде разгледана можноста за склучување договор или меморандум за соработка во областа на упатувањето осигурени лица на лекување меѓу двете држави.
Со таков акт би се утврдиле процедурите, постапките и начинот на реализација на упатувањето на лекување. Целта е осигурениците поефикасно да ги остваруваат своите права, а институционалната соработка меѓу ФЗО и словенечкиот Завод дополнително да се унапреди.
Од Фондот посочуваат дека регионалната и меѓународната соработка има практична вредност кога размената на искуства создава подобри решенија за осигурениците. Тоа подразбира поефикасни процедури, подобро управување со средствата, поголема контрола и полесно остварување на правата од здравственото осигурување.