ДРЕСОТ НА ПЕЛЕ ПРОДАДЕН ЗА РЕКОРДНИ 4,9 МИЛИОНИ ДОЛАРИ: Втор најскап фудбалски дрес во историјата на аукциите

Дресот што легендарниот Пеле го носеше во финалето на Светското првенство во 1958 година е продаден за 4,9 милиони долари на аукција организирана од аукциската куќа „Сотбис“ во Њујорк. Со оваа продажба, тој стана вториот најскап фудбалски дрес што некогаш бил продаден на аукција, а воедно и највредниот предмет поврзан со бразилската фудбалска легенда.

Пред него на листата останува само дресот што Диего Марадона го носеше против Англија на Светското првенство во 1986 година, кога го постигна прочуениот гол со „Божјата рака“. Тој дрес во 2022 година беше продаден за околу 9,3 милиони долари.

За дресот на Пеле биле доставени вкупно десет понуди од повеќе од пет заинтересирани купувачи.

Вредноста на дресот пораснала повеќе од 45 пати

Продажбата покажува колку значително пораснала вредноста на овој историски предмет. Истиот дрес во 2004 година бил продаден за 105.600 долари, што значи дека неговата цена во изминатите две децении се зголемила повеќе од 45 пати.

Пеле го носеше овој дрес во финалето на Светското првенство во 1958 година против Шведска, кога како 17-годишник постигна два гола и му ја донесе на Бразил првата од вкупно трите светски титули.

Тој и денес го држи рекордот како најмладиот фудбалер што постигнал гол во финале на Светско првенство.

„Денешниот резултат е силна потврда за трајното наследство на еден од најголемите фудбалери на сите времиња. Овој дрес не е само вечен потсетник на еден од најважните моменти во историјата на фудбалот, туку е директно поврзан со мигот што го претвори Пеле во светска спортска икона“, изјави Брендон Хоукс, директор за спортска стратегија и развој во „Сотбис“.

Продадени и предмети на Марадона, Меси и Бекам

На аукцијата „The Beautiful Game“ беа продадени и други вредни предмети од светот на фудбалот.

Капитенската лента што Диего Марадона ја носеше на Светското првенство во 1986 година, вклучително и на натпреварот против Англија, беше продадена за 512.000 долари.

Дресот на Лионел Меси од историскиот пресврт на Барселона против Пари Сен Жермен во 2017 година, кога каталонскиот клуб победи со 6:1 во Лигата на шампионите, достигна цена од 217.600 долари.

На аукцијата беше продаден и дресот на Дејвид Бекам од неговиот 50. настап за репрезентацијата на Англија на Светското првенство во 2002 година, за сума од 51.200 долари.