Турскиот претседател Реџеп Таип Ердоган предложи да се организира референдум за измена на уставот за да се гарантира правото на носење хиџаб во јавните служби, училиштата и универзитетите.
„Ако сте храбри, дојдете, да го ставиме на референдум. Нека одлучи народот“, рече турскиот претседател, обраќајќи му се на лидерот на најголемата опозициска партија, Кемал Киличдароглу, кој предложи закон кој ќе го гарантира правото на носење хиџаб.
Дебатата за носење хиџаб се разгоре во Турција како што се приближуваат претседателските и парламентарните избори закажани за 2023 година.
Турција, земја со мнозинско муслиманско население, е уставно секуларна и носењето хиџаб долго време е забрането во јавните служби, училиштата и универзитетите, како и на места како што се парламентот и воените канцеларии. Во 2013 година, владата на Ердоган ги укина ограничувањата за носење хиџаб.
За разлика од 1990-тите кога оваа тема поттикна жестока дебата, денес ниту едно политичко движење во Турција не се противи на неговата забрана.
„Ние згрешивме во минатото во врска со носењето хиџаб. Сега е време да го оставиме тоа прашање настрана и повеќе да не го слушаме од устата на политичарите“, рече претседателот на главната опозициска Републиканска народна партија ( ЦХП), Кемал Киличдароглу, на почетокот на октомври.
Набљудувачите мислат дека Киличдароглу сака да им покаже на конзервативните гласачи, кои најмногу гласаат за АКП на Ердоган, дека не треба да се плашат од промена на власта.
На почетокот на октомври, Ердоган одговори на оваа иницијатива за привлекување конзервативни гласови со тоа што го повика својот политички противник да го промени уставот во оваа насока.
„Дали денес постои дискриминација во однос на носењето и неносењето хиџаб во јавните служби? Во училиштата? Не. Успеавме во тоа“, рече денеска Ердоган.
„Наскоро ќе го испратиме амандманот на уставот во парламентот.Но, ако не може да се реши во парламентот, ќе го прашаме народот“, додаде тој.