Германија ја прекинува испораката на воена опрема поради заострувањето на конфликтот во Газа
Германскиот канцелар Фридрих Мерц објави дека Германија ја прекинува испораката на воена опрема која може да се користи во Појасот Газа. Одлуката следи откако Берлин оцени дека Израел се подготвува за „уште поостро воено дејствување“ во регионот. Со тоа, Германија презема поголема одговорност за заштита на цивилното население.
„Израел мора трајно да ја подобри хуманитарната состојба во Газа и да обезбеди целосен пристап на помошта за ОН и невладините организации“, порача Мерц.
Тој додаде и повик до Тел Авив „да не презема чекори кон анексија на Западниот Брег“.
Нетанјаху ја критикува Германија, ја обвинува за наградување на тероризмот
Израелскиот премиер Бенјамин Нетанјаху остро реагираше на одлуката на Германија. Во соопштение од неговиот кабинет, тој обвини дека Германија со ембаргото „го наградила тероризмот на Хамас“. Според податоците од германската влада, од 7 октомври 2023 до 13 мај 2025, Германија испорачала различна воена опрема на Израел. Меѓу испорачаната опрема се наоѓаат огнено оружје, муниција, специјални оклопни возила, електронска опрема и делови за морнарица. Дел од таа опрема, како противтенковско оружје и муниција, може да се користи и во Газа, но подморниците и системите за одбрана од Иран не се опфатени со забраната.