Европските челници изненадени од ветувањето за уставни измени за Бугарите
Поранешниот вицепремиер Артан Груби и екс-министерот за надворешни работи Бујар Османи пред три години гарантирале пред високи функционери на Европската Унија дека Македонија ќе ги внесе Бугарите во својот Устав. Ова го потврдуваат извори од Министерството за надворешни работи и надворешна трговија.
Според нивните информации, Груби и Османи уверувале дека македонската Влада има подготвен конкретен план за обезбедување на двотретинско мнозинство во Собранието за спроведување на уставните измени согласно барањата на Бугарија.
Европската Унија била зачудена од брзото прифаќање на францускиот предлог
Изворите од МНР наведуваат дека европските претставници биле зачудени од фактот што Владата на Димитар Ковачевски, заедно со неговите тогашни најблиски соработници – првиот заменик Груби и министерот Османи – брзо го прифатиле францускиот предлог во 2022 година, кој станал предуслов за почеток на преговорите со ЕУ. Тие просто така гарантирале уставни измени за Бугарите.
Нивното изненадување произлегувало од сомнежот дека Македонија има капацитет воопшто да го спроведе договореното.
Недостиг на широка дебата во македонската јавност
Без широка и отворена јавна расправа, Владата го прифатила францускиот предлог. Според дипломатските извори, европските челници уште од почетокот сметале дека ваквиот предлог ќе донесе дополнителни компликации и блокади во евроинтеграцискиот процес.
Владата бара „одложено дејство“ на уставните измени
Во моментов, клучна цел на македонската Влада е да ги избегне натамошните билатерални пречки со Бугарија. Актуелната Влада инсистира на „одложено дејство“ за овие уставни измени. Тоа значи дека внесувањето на бугарската заедница во македонскиот Устав би се реализирало дури по успешното завршување на преговарачкиот процес со Европската Унија.
Стравувања од идни бугарски блокади
Денес, постои реална загриженост дека дури и по евентуалното успешно спроведување на уставните измени, Бугарија може повторно да наметне нови билатерални спорови и повторно да ја блокира Македонија на нејзиниот евроинтеграциски пат.
Досегашните ветувања не доведоа до официјален датум за преговори
Поради прифаќањето на овие услови во времето на претходната владејачка гарнитура, денес Македонија е блокирана и сè уште нема официјален почеток на преговори со Европската Унија. Во повеќе наврати претходната влада на СДСМ тврдеше дека добила датум за преговори, но таков датум до овој момент официјално не е реализиран.
Според изворите од МНР, токму ветувањето кое претходно го дале Груби и Османи пред европските партнери останува централна причина за сегашната блокада на македонскиот евроинтеграциски процес. Во меѓувреме, Владата настојува да ги спречи натамошните билатерални проблеми со барање на решение за „одложено дејство“ во спроведувањето на договорените уставни промени.
Извор: Alfa