Министерот за надворешни работи и надворешна трговија Тимчо Муцунски денеска оствари работна средба со вршителот на должноста амбасадор на Соединетите Американски Држави, Никол Варнс. Главниот фокус на разговорите бил ставен врз билатералните односи и натамошното продлабочување на севкупната соработка меѓу двете пријателски земји.
Како што информира Муцунски преку објава на социјалните мрежи, на средбата била детално разгледана динамиката на реализација на сите активности што се предвидени во рамките на Стратешкиот дијалог меѓу Македонија и САД.
Посебен акцент за време на средбата бил ставен на економската соработка, трговската размена и можностите за покренување нови конкретни иницијативи со единствена цел за континуирано унапредување на партнерските односи.
На состанокот станало збор и за позитивните оценки кои се нотирани за надворешната политика на Македонија во последниот официјален Извештај на Европската комисија.
Муцунски притоа нагласил дека надворешната политика на државата останува целосно усогласена со Заедничката надворешна и безбедносна политика на Европската Унија. Тој исто така посочил дека стратешките надворешнополитички приоритети цврсто се темелат врз долгогодишното партнерство со САД и сојузништвото во рамките на НАТО алијансата.