Сингапурската компанија за кибербезбедност и управување со надворешни закани „Сајфирма“ соопшти дека хакерска мрежа, за која постојат сомневања за поврзаност со озлогласената севернокорејска група „Лазарус“, подготвувала напади врз повеќе од 200 сервери ширум светот.
Според наодите на безбедносните експерти од „Сајфирма“, хакерите во текот на октомври таргетирале точно 216 сервери лоцирани во десет различни држави како потенцијални мети за дигитални упади. Аналитичарите добиле увид во списокот составен од хакери од корејското говорно подрачје, на кој се наоѓаат владини агенции, финансиски институции, банки, телекомуникациски компании и даватели на критична инфраструктура.
Најголемиот дел од таргетираните цели се наоѓаат во азиско-пацифичкиот регион со вкупно 148 сервери, по што следуваат Северна Америка со 49 и подрачјето на Блискиот Исток со 19 сервери. На територијата на САД и Јапонија отпаѓаат 44,4 проценти од целата листа, додека во Јужна Кореја биле регистрирани вкупно 30 сервери на мета на групата.
Експертите наведуваат дека главните мотиви за подготвуваните кибернапади биле директна финансиска корист и шпионажа, при што во извештајот се прецизира дека не биле компромитирани сите сервери кои се наоѓале на хакерската листа.
Од компанијата предупредуваат дека рутинското ажурирање на веб-апликациите не претставува доволна заштита од ваквите безбедносни ранливости и упатија апел до системските администратори веднаш да имплементираат значително построги безбедносни протоколи.