Иран е подготвен да продолжи со преговори со САД, но само доколку Вашингтон го промени својот пристап, пораката што преку Јапонија ја пренесол Техеран, јавува „Sky News“.
Во телефонски разговор со јапонската премиерка Санае Такаичи, иранскиот министер за надворешни работи Абас Арагчи изјавил дека нестабилноста во регионот е последица на американските потези. Тој се осврнал и на блокадата на Ормускиот Теснец, која ја нарекол „американско поморско пиратство“.
Иранските државни медиуми го цитираат Арагчи дека Техеран останува подготвен за дипломатија, но само ако САД го променат својот пристап.
Иранскиот претседател Масуд Пезешкијан исто така разговарал со јапонската премиерка, при што нагласил дека за нестабилноста во регионот се одговорни Израел и САД, според државните медиуми.
Иако ваквите ставови не се нови и повеќепати се повторувани, дипломатските разговори остануваат во застој. САД не се откажуваат од притисокот, додека Иран инсистира на промена на условите пред евентуално продолжување на преговорите.