Осасуна го враќа Јагоба Арасате на тренерската позиција, откако раководството на клубот одлучи да ја прекине соработката со Луис Мигел Рамис. Шпанскиот стратег доби отказ по убедливиот пораз од Бетис со 5:2, а Арасате потпиша нов договор со клубот од Памплона со важност до 30 јуни 2029 година.
Одлуката за тренерската смена доаѓа по серијата слаби резултати на Осасуна, која по осум одиграни натпревари во шпанската Ла Лига се наоѓа на 16-тото место на табелата со само осум освоени бодови. Тимот загуби четири од последните пет првенствени средби, а во тој негативен период прими дури 17 голови. Тешкиот пораз од Бетис беше последниот удар за Рамис, кој ја презеде екипата во јули годинава.
Арасате се враќа во средина во која претходно остави значаен белег. Тој успешно ја предводеше Осасуна од 2018 до 2024 година, период во кој успеа да го врати клубот во Примера дивисион, а потоа да обезбеди пет последователни стабилни сезони во шпанската елита.