Во Кавадарци е во тек исплатата на финансиската поддршка за првачињата, како и на средствата за менторите и наградените ученици, соопшти градоначалникот Митко Јанчев. За додатокот за првачиња се исплаќаат 702.000 денари, за менторите 653.268 денари, а за наградените ученици 856.581 денар.
Според објавата на Јанчев, средствата за првачињата се наменети за учебната 2026/2027 година и се исплаќаат по претходно поднесено барање. Финансиската поддршка за менторите и наградените ученици, како што е наведено во постот, се однесува на учебната 2026 година.
Градоначалникот порача дека успесите на учениците и нивните ментори се причина за гордост и дека нивната работа ќе продолжи да добива поддршка.
„Горди сме на сите успеси на учениците заедно со нивните ментори. Затоа што тие се наши амбасадори, нашата гордост и секогаш ќе ја имаат нашата поддршка“, напиша Јанчев.
Тој изрази надеж дека финансиската поддршка ќе биде дополнителен поттик за нови достигнувања, а на првачињата им посака успешно образование.
„Се надеваме дека со ова ќе ги поттикнеме сите за уште поголеми успеси, на првачињата им посакуваме успех во текот на своето образование“, порача градоначалникот.