Судот го отстрани Љупчо Палевски од судницата на барање на обвинетиот Влатко Кешишев
Пред денешното рочиште, адвокатот на обвинетиот Влатко Кешишев, Игор Ефремов, побара од судот да го отстрани Љупчо Палевски од судницата за време на сведочењето на неговиот клиент. Тој истакна дека Кешишев се плаши да говори пред Палевски и дека можно е да не ја каже вистината.
Дополнително, Ефремов тврдеше дека Палевски му давал на Кешишев некакви ливчиња за да ги потпише во негово име. На ова реагираше самиот Палевски, негирајќи ги обвинувањата.
„Ова се лаги, посебно тоа дека сум давал писма и изјави кои треба да се препишат во мое име. Може да биде свртен и со грб, но битно ми е да слушам што ќе изјави“, рече Палевски.
Судијата Ивица Стефановски, повикувајќи се на член 391, став 4 од Законот, донесе одлука Љупчо Палевски – Палчо да биде отстранет од судницата.
„На 25.11 Палчо му дал на Кешишев изјава да ја препише и да ја достави до судот додека во комбе се превезувале од затвор кон суд. Со тоа Палчо влијаел врз Кешишев, поради што судот донесе мерка за негово оддалечување од судницата“, образложи судијата.
Адвокатот на Палевски, Страшевски, најави дека ќе го напушти судењето во знак на протест.
„Јас ќе го напуштам судењето. Ниту е утврден стравот од доктор или вешто лице, но судот носи вакви одлуки што се срамни. Срамот е само на збор кажан, без докази. Ова е само една приказна која, за жал, судот ја прифати. Невозможно е вакво решение да се донесе само врз основа на зборовите на една страна. Во ваква атмосфера, јас како бранител на Палевски не можам да учествувам во хајка и драма што непотребно се прави. Барам да повикаме вешто лице за да утврдиме дали Кешишев има страв да говори пред Палевски, а нема страв да одговара на неговите прашања во постапката“, изјави Страшевски.
Судијата Стефановски го предупреди адвокатот дека ќе биде парично казнет доколку го напушти судењето, додавајќи дека во таков случај ќе биде назначен друг адвокат по службена должност.
Претходно, Велибор Манев пред судот призна дека Љупчо Палевски го убил Панче Жежовски и го уценувал да молчи.