Состојбата на повредените во трагичниот пожар во Кочани се подобрува. Но и натаму постои ризик, изјави директорот на Фондот за здравствено осигурување на Македонија (ФЗОМ), Сашо Клековски. Тој нагласи дека иако се намалува бројот на критични пациенти, опасноста од инфекции сè уште е присутна.
Борбата не е завршена
„Нема простор за опуштање, бидејќи со намалување на акутните ризици од изгореници и респираторни повреди, сега се зголемува опасноста од инфекции. Борбата ќе биде долга и неизвесна,“ изјави Клековски на денешната прес-конференција.
Во моментов, 54 повредени пациенти се лекуваат во Македонија и сите се во стабилна состојба. Од вкупно 115 пациенти кои се на лекување во странство, шест се во критична состојба. Дополнително, вчера на Клиниката за токсикологија биле хоспитализирани шест нови пациенти, од кои еден со сериозни респираторни проблеми и изгореници.
Подготовки за враќање на пациенти во земјата
Според Клековски, во понеделник се очекуваат првите протоколи за враќање на пациентите кои се во подобра здравствена состојба. Процесот ќе започне во втората половина од неделата, а во него ќе учествуваат тимови од Израел и Велика Британија, кои помагаат во планирањето на рехабилитацијата и понатамошниот третман.
Државата покрива сите трошоци за лекувањето
Клековски нагласи дека болничкото лекување во странство е целосно покриено од државата. „Сите информации за дополнителни трошоци што се појавуваат во јавноста се дезинформации,“ потенцираше тој.
Поддршка за повредените и нивните семејства
ФЗОМ издал насоки до матичните лекари за отстранување на ограничувањата при пропишувањето на лекови и боледувања за повредените од пожарот во Кочани и нивните семејства. „Имаме одлична соработка со матичните лекари, кои одиграа клучна улога во менаџирањето на целата ситуација,“ заклучи Клековски.
Трагедијата во дискотеката „Пулс“ во Кочани на 16 март однесе 59 животи, а околу 200 лица беа повредени. Институциите продолжуваат со активностите за обезбедување соодветна медицинска нега и поддршка на сите засегнати.