Судење за Емилија Пешева: Обвинетиот ја призна вината пред судот

Во Штипскиот суд започна судењето за убиството на 29-годишната Емилија Пешева, кое се случи на 1 ноември минатата година. Обвинетиот, Фадил Зенделов, беше донесен од затворот во Куманово и пред судот јавно ја призна вината за убиството, пренесува ММС.

„Ја убив Емилија затоа што мислев дека ме изневерува,“ изјави Зенделов, објаснувајќи дека дејството го сторил воден од љубомора бидејќи биле во љубовна врска.

Судбинската средба што заврши трагично

Фадил ја повикал Емилија на средба, по што се нашле во населбата Суитлак во Штип. Разговорот брзо прераснал во жестока расправија, по што обвинетиот ѝ удрил силен удар со тупаница, по што Емилија паднала на колена. Потоа, ја фатил за вратот, ја соборил на земјата и почнал да ја дави, сè додека не престанала да дише.

Откако ја убил, обвинетиот го напуштил местото на злосторството, но набргу сам се пријавил во полиција.

Обвинителството бара доживотен затвор

Обвинителството го гони Фадил Зенделов за кривично дело фемицид, согласно член 123 од Кривичниот закон и бара максимална казна – доживотен затвор.

И адвокатите на семејството на Емилија го поддржуваат ова барање.

  • Мишко Чолаков, адвокат на семејството на Емилија:
    „Обвинетиот ја призна вината. Ние како полномошници на оштетените единствено бараме максимална казна – доживотен затвор. Чекаме одлуката на судот, која ќе биде објавена во среда.“

Семејството на Емилија: „Сакаме правда“

Таткото на Емилија, Слободан Пешев, вели дека семејството не може да ја преболи загубата, а внукот кој таа го оставила секојдневно ја бара својата мајка.

  • Слободан Пешев, татко на Емилија:
    „Денеска не смееш ниту маче ниту куче да убиеш, а ова беше млад човек, мајка што остави дете. Тоа дете не оди во школо, си ја бара мајката, а ние не знаеме како да му помогнеме. Тешко ни е. Ако му дадат доживотна казна, барем малку ќе се смирам.“

Мајката на Емилија, Џемиле Пешева, не може да се помири со фактот дека не успеала да ја спречи ќерка ѝ да се види со убиецот.

  • Џемиле Пешева, мајка на Емилија:
    „Ми рече: ‘Мамо, сакам да му раскинам.’ Ја молев да не оди, дека може нешто лошо да ѝ се случи. Јас сакав да одам со неа, но не ме послуша. Како мајка, во срцето почувствував дека нешто страшно ќе се случи. Сега единствено барам доживотна казна за убиецот. Кога Емилија ќе излезе од гроб, тогаш и тој нека излезе од затвор.“

Очекување на пресудата

Пресудата за Фадил Зенделов ќе биде објавена во среда, а семејството на Емилија и јавноста очекуваат правда. Овој случај повторно го отвори прашањето за фемицидот во Македонија и потребата од построги мерки за заштита на жените од родово базирано насилство.