Продолжување на гасификацијата низ повеќе делови на градот
Куманово ќе добие дополнителни 6,5 километри секундарна гасификациона мрежа на повеќе локации низ градот. Проектот се финансира преку вториот повик од унгарски кредит, а во моментов се спроведува постапка за избор на изведувач. Градежните активности се очекува да започнат напролет.
Со новата мрежа се предвидува гасификација на улиците „Драган Стопаревиќ“, „АВНОЈ“, „Народна револуција“, „Никола Тесла“ и „Доне Божинов“ до влезот на населбата „Карпош“. Дополнително, мрежата ќе се прошири на дел од „Тоде Думба“, „11 Ноември“, кај училиштето „Толи Зордумис“, како и на улиците „Вараждинска“ и „Горњомилановачка“.
Придобивки за граѓаните и претпријатието
Марко Митровски, директор на ЈП „Куманово-гас“, истакна дека проектот ќе овозможи нови приклучоци и стабилизирање на финансиската состојба на претпријатието. Тој додаде дека истовремено ќе се подобри квалитетот на животната средина и ќе се намали загадувањето на воздухот во Куманово.
Минатото лето беше завршена изградбата на дистрибутивна гасоводна мрежа во должина од 2,5 километри, на потегот од дел од улицата „Видео Смилевски Бато“ до селото Доброшане, како и во Индустриската зона Доброшане.
Ефекти од изградбата на секундарната мрежа
Владата појаснува дека проектот има цел проширување на гасоводната инфраструктура и овозможување пристап до природен гас за деловните субјекти и потенцијалните инвеститори во индустриската зона. Со изградбата на секундарната мрежа се создадоа услови за поекономично, енергетски поефикасно и еколошки одржливо снабдување со енергија.
Инвестицијата за овој проект изнесуваше 10.893.656 денари.