Средба меѓу Божиновска и претседателот на МАНУ
Министерката за енергетика, рударство и минерални суровини, Сања Божиновска, оствари работна средба со претседателот на Македонската академија на науките и уметностите, академик Живко Попов.
На средбата било разговарано за воспоставување поинтензивна соработка меѓу Министерството и МАНУ при креирањето на стратешките политики во енергетиката, рударството и управувањето со минералните суровини.
Домашното знаење во основата на националните политики
Било истакнато дека современите предизвици во енергетскиот сектор, енергетската транзиција и одржливото управување со минералните суровини бараат посилна поврзаност меѓу институциите и академската заедница.
Божиновска оценила дека досегашната соработка со МАНУ, особено при подготовката на стратешките документи за развој на рударскиот сектор, покажува дека земјава располага со домашни експерти кои добро ги познаваат состојбите, потенцијалите и потребите на државата.
Според министерката, професорите, академиците и стручните лица треба поактивно да учествуваат во изработката на стратешките документи и развојните планови, со цел политиките да се засноваат врз домашно знаење, практично искуство и национален интерес.
Фокус на новите технологии и енергетската транзиција
На средбата била разгледана и можноста за поинтензивна соработка со Одделот за технички науки при МАНУ, особено во областа на енергетиката.
Новиот Закон за енергетика предвидува решенија за батериски системи за складирање електрична енергија, паметни и модерни мрежи, електромобилност, нови модели на производство, пренос и дистрибуција, како и интегрирање современи технологии во енергетскиот систем.
Божиновска и Попов се согласиле дека соработката меѓу институциите и научната заедница треба да биде континуирана и да придонесе за квалитетни и одржливи решенија во развојот на македонската енергетика, рударството и минералните суровини.