Францускиот претседател бара масовен европски одговор
Францускиот претседател Емануел Макрон жестоко реагираше на новите царини што ги објави Доналд Трамп. Ги нарече „брутални, неосновани и шокантни“ за меѓународната трговија.
Трамп воведе царини за 60 држави, за Македонија 33 проценти
Макрон изјави дека Европа мора да одговори, анализирајќи ги мерките во секој индустриски сектор поединечно. Нагласи дека реакцијата на ЕУ ќе биде помасовна од претходните одмазднички царини воведени за челик и алуминиум.
Блокада на инвестиции во САД
Макрон ги повика француските компании да ги суспендираат сите инвестициски проекти во САД. Тоа да трае сè додека не се разјасни ситуацијата со новите царини.
„Важно е сите идни или неодамна најавени инвестиции да бидат привремено прекинати додека не ги разјасниме работите со САД“, изјави Макрон на средбата со претставниците на француската индустрија.
Францускиот претседател постави прашање за логиката на инвестирање во САД во момент кога европската економија е директно погодена од американските мерки.
Европа размислува за координиран одговор
Макрон нагласи дека Европската унија мора да има единствен и силен став против овие царини. Мора да ги заштити своите економски интереси. Според него, доколку главните европски економски играчи продолжат да инвестираат во САД без реакција, тоа ќе испрати погрешен сигнал во момент на економски напад.
Очекувањата се дека оваа ситуација ќе предизвика брзи реакции од Брисел, а европските лидери ќе се состанат за да одлучат за заедничка стратегија.
Извор: Миа.мк