Во протестите против високите трошоци за живот кои денеска се одржаа по шести пат по ред низ цела Франција учествуваа 82.500 луѓе, соопшти француското Министерство за внатрешни работи. Од друга страна, организаторите тврдат дека на улиците излегле 150.000 демонстранти.
Според податоците на полициските власти, во главниот град Париз протестирале 21.500 граѓани. Унијата на студенти, како една од организациите што упати јавен повик за демонстрациите, посочува дека во француската престолнина биле собрани 45.000 луѓе, според извештаите на телевизијата БФМ.
Денешниот протестен марш во Париз се движеше по релацијата од Плоштадот на републиката до Плоштадот на нацијата и помина без сериозни нарушувања на јавниот ред по планираната рута, информираше полициската префектура. Истовремено, органите на редот регистрираа обиди на одредени маскирани групи да изведат ненајавени собири и маршеви низ други делови од градот.
Денешните собири се одвиваа во период кога граѓанското движење „Жолти елеци“ ја одбележува својата осма годишнина од почетокот на делувањето.
На улиците се придружија синдикатите, студентските и средношколските здруженија, заедно со припадниците на „Жолтите елеци“, барајќи конкретни владини чекори за стопирање на растот на трошоците за живот и темелна ревизија на економските политики.
Претставниците на студентските и средношколските сојузи порачаа дека нема да ги прекинат протестните активности сè додека извршната власт не понуди решенија за нивните социјални барања. Според евиденцијата на Министерството за внатрешни работи, одѕивот бележи пад во однос на претходните собири, со оглед на тоа што минатата сабота протестираа 106.000 лица, неделата пред неа 146.000, на 31 октомври имаше 320.000 демонстранти, додека на првиот голем протест на 17 октомври беа евидентирани вкупно 550.000 луѓе.
