Министерството за образование заврши со постапките за затворање на два института, а тече и истрага за уште три институти кои можат да се соочат со слични мерки. Според министерката Весна Јаневска, јавноста ќе биде информирана по комплетирањето на процесите, кога ќе бидат достапни сите податоци за утврдените неправилности.
„Процесот за два института е завршен, а во моментот тече истрага за уште три. Кога сè ќе биде финализирано, ќе ги објавиме информациите,“ истакна Јаневска.
Универзитетите под контрола на Министерството за образование
Освен институтите, Министерството за образование спроведува контрола и на универзитетите преку Државниот просветен инспекторат. Откриени се неправилности кај одредени универзитети, за кои е започната постапка за казнување на одговорните лица, вклучувајќи рецензентски комисии, декани и ректори.
„Кај некои универзитети се утврдени неправилности, а процесот на казнување е во завршна фаза,“ објасни Јаневска, истакнувајќи дека сите универзитети ќе бидат предмет на ревизија.
Министерството за образование инвестира во нови центри за стручно образование
Во рамките на својата посета во Штип, министерката Јаневска го посети средното училиште „Коле Нехтенин“, кое ќе стане еден од осумте регионални центри за стручно образование. Овие центри се дел од заложбите на Министерството за образование за унапредување на стручната обука и поддршка на младите.