Празникот носи пораки за солидарност и заедништво
Премиерот Христијан Мицкоски упати честитки до сите верници од исламска вероисповед по повод Рамазан Бајрам.
„Во овие свети денови, кога се заокружува месецот на пост, трпение и духовна посветеност, да се потсетиме на вистинските вредности што нè обединуваат како луѓе: почитта, солидарноста, хуманоста и грижата за другиот“, истакна Мицкоски.
Премиерот нагласи дека празникот нè потсетува на важноста на помагањето и меѓусебното разбирање.
„Овој празник нè учи дека силата на едно општество се мери преку тоа колку сме подготвени да подадеме рака, да помогнеме и да покажеме разбирање“, додаде тој.
Градење доверба и заедничка иднина
Мицкоски подвлече дека како народ отсекогаш сме знаеле да стоиме еден покрај друг во најважните моменти.
„Токму затоа, денес повеќе од кога било, потребно е да го негуваме соживотот, да градиме доверба и да вложуваме во заедничка иднина исполнета со мир, стабилност и просперитет за сите граѓани“, рече премиерот.
Убави желби за семејство и заедница
„Нека радоста од Бајрам ги исполни вашите домови со топлина, љубов и благосостојба. Да ги споделиме убавите моменти со семејството, пријателите и сите оние на кои им е потребна поддршка и внимание. Со искрени желби за здравје, напредок и благодет!“, порача Мицкоски.