Основниот суд во Охрид донесе пресуда за Илија Спасески и Борче Ангелов, обвинети за претепувањето на Христијан Пендиков. Тие се осудени на по осум месеци затвор за нанесување тешка телесна повреда, но судот оцени дека мотивот „омраза“ не е докажан, изјави адвокатот на Пендиков за БТА, а пренесе Бугарското национално радио (БНР).
Нападот врз Пендиков и неговото лекување во Софија
Нападот се случи во вечерните часови на 19 јануари 2023 година пред ресторан во Охрид. Пендиков, кој беше секретар на веќе забранетото бугарско здружение „Цар Борис Трети“, претрпе тешки повреди, вклучувајќи:
- Напукнати пршлени
- Скршена вилица
- Испукани ребра
- Три скршени заби
Тој беше пренесен со претседателски авион на лекување во Воената медицинска академија во Софија, а инцидентот предизвика политички тензии меѓу Македонија и Бугарија. По закрепнувањето, тој доби бугарско државјанство, кое му беше свечено врачено од бугарскиот државен врв.
Мотивот останува спорен – двете страни можат да поднесат жалба
Пендиков тврди дека бил нападнат заради својата бугарска самоидентификација, но одбраната го негираше ова. Етничката омраза не беше утврдена како мотив.
Судијата Бојан Мартиновски ја донесе пресудата нешто повеќе од две години по првото рочиште, но деталите ќе бидат јасни кога писмениот документ ќе биде доставен до страните во постапката.
Обвинителството и одбраната имаат рок од 14 дена да поднесат жалба, пренесе БНР.бг.
Извор: Макфакс