Обвинувања за опасни наративи и „држава во држава“
Во интервју за Канал 5, Муцунски го обвини Османи дека по најавата за кандидатура за градоначалник на Чаир, ширел „опасни наративи за автономија во одлучувањето“ кои, како што оцени, претставуваат ризик не само за уставниот поредок, туку и за регионалната стабилност.
„Јасно треба да му биде дадено до знаење дека унитарниот карактер никој нема да го наруши. Оваа држава, ниту била ниту ќе биде федерација или конфедерација“, изјави Муцунски, додавајќи дека ќе бидат преземени проактивни мерки против вакви изјави.
Османи возвраќа: „Функционалната унитарност е зацртана во Охридскиот договор“
На ваквите обвинувања, Османи возврати преку својот профил на Фејсбук, тврдејќи дека ваквиот модел на функционална унитарност е токму оној којшто бил договорен во Охридскиот рамковен договор. Тој истакна дека современата македонска државност се темели врз соживот и колективни права, и дека „вистинското вреднување на овој механизам не ја загрозува, туку ја зајакнува внатрешната кохезија како основно врзивно ткиво на унитарноста“.
Османи додаде дека секој обид да се оспорат тие постигнати рамки претставува напад врз темелите на државата и интересите на сите граѓани, без оглед на етничка припадност.
Децентрализацијата и застапеноста како клучен компромис
Османи потсети дека решението не е во политичка инструментализација на колективните права, туку во нивно доследно спроведување – преку правична застапеност, децентрализација и заштита на интересите на заедниците, како што предвидува Охридскиот договор. Притоа нагласи дека унитарниот карактер останува неприкосновен, но со вградени механизми за функционална еднаквост.