Директорот на Царинската управа, Бобан Николовски во синоќешното интервју во емисијата „Топ Тема“ на Телма ТВ изјави дека минибусот, во кој беа фатени половина милион евра на граничниот премин „Табановце“, тргнал од Германија кон Албанија со седум албански државјани, а каде требало да завршат парите, ќе треба да дознаат други институции.
„Тимот е составен од многу искусни луѓе коишто собирале информации што се случива во регионот. Доаѓа такво возило, го селектираат, се прави детална контрола, сомнително им е уште повеќе, викаат дополнително куче од К-9 единицата, кучето на прва доаѓа и маркира дека има нешто сериозно, повикуваат скенер, скенерот покажува поголема густина во самата плоча. Нашите оперативни, користејќи физичка сила, го отвораат до крај, излегува конец, кој кога ќе го повлечете, што повеќе влечете, толку повеќе купчиња, снопчиња пари излегуваат“, сподели Николовски.