Нов инфраструктурен успех: Експресниот пат пуштен во употреба

Денеска беше пуштен во употреба експресниот пат Крива Паланка – Длабочица – Страцин, долг 25,5 километри. Проектот, финансиран со 107 милиони евра од Светска банка и ЕУ, го подобрува поврзувањето на Македонија со Бугарија и го скратува времето на патување. На свеченото отворање присуствуваа премиерот Христијан Мицкоски, заменик шефот на делегацијата на ЕУ, Бен Нупнау, министерот за транспорт и врски, Александар Николовски, и директорот на ЈПДП, Коце Трајановски.

Карактеристики на експресниот пат Крива Паланка – Длабочица – Страцин

Новиот патен правец содржи:

  • Две ленти за возење (ширина 3,5 метри).
  • Две ленти за застанување (ширина 2,5 метри).
  • Три клучки, 13 вијадукти, девет надвозници и 44 косини.

Оваа инфраструктурна инвестиција значително го подобрува регионалниот транспорт, трговијата и поврзаноста со европските пазари.

Мицкоски: „Ова е пат на граѓаните“

Премиерот Христијан Мицкоски истакна дека патот е симбол на заедничкиот труд на граѓаните:

„Ова не е пат на ВМРО-ДПМНЕ или СДСМ. Ова е пат за граѓаните, направен со нивни средства. Користете го со задоволство!“

Тој најави нови инвестиции, вклучувајќи делници од Коридорите 8 и 10, како и проекти на релациите Гостивар – Букојчани, Кичево – Охрид, Прилеп – Битола и други.

Николовски: „Македонија како крстосница“

Министерот за транспорт и врски, Александар Николовски, го оцени патот како клучен за развојот на источниот дел на земјата:

„Овој експресен пат е витална артерија за поврзување со Бугарија. Македонија мора да ја искористи својата уникатна локација за да стане транспортна и енергетска крстосница. Ова е патот кон економски раст и задржување на граѓаните дома.“

ЕУ: „Коридорот 8 ги зближува истокот и западот“

Заменикот шеф на делегацијата на ЕУ, Бен Нупнау, изјави дека експресниот пат е дел од Коридорот 8, кој го поврзува Јадранското со Црното Море:

„Овој проект ја зголемува конкурентноста на Македонија, привлекува инвестиции и ја олеснува трговијата. ЕУ со гордост стои покрај Македонија во реализацијата на вакви проекти.“

Директорот на ЈПДП: „Проектот завршен во рекордно време“

Директорот на ЈПДП, Коце Трајановски, го пофали тимскиот труд што доведе до успешно завршување на проектот:

„Кога го презедов проектот, работите беа забавени. Со специјални методи за асфалтирање во зимски услови, успеавме да го завршиме до крајот на 2024 година.“