НОВА ЕСКАЛАЦИЈА МЕЃУ САД И ИРАН: Нападнати цели во Заливот, Техеран го затвори Хормускиот Теснец

Американските и иранските сили разменија силни ракетни напади и удари со беспилотни летала, при што Техеран ги таргетираше американските објекти во земјите од Персискиот Залив и соопшти дека повторно го затворил Хормускиот Теснец.

По серијата напади во изминатите денови, американскиот претседател Доналд Трамп прогласи крај на прекинот на огнот, кој требаше да ги запре борбите започнати на 28 февруари. Сепак, тој ја остави отворена можноста за продолжување на разговорите.

Иран соопшти дека Хормускиот Теснец е затворен

Ескалацијата следува по неколку пријавени напади врз комерцијални бродови во регионот. Иран соопшти дека го затворил теснецот откако предупредувачки истрел погодил брод што се движел по неовластена рута, а во неделата било објавено дека е онеспособен уште еден брод.

Иранската Револуционерна гарда порача дека теснецот ќе остане затворен до „крајот на мешањето на САД во овој регион“.

Од американската Централна команда, пак, соопштија дека комерцијалните бродови и натаму минуваат низ водниот пат, преку кој пред војната се транспортирала една петтина од светските испораки на нафта и течен природен гас.

Американските сили нападнале стотици ирански цели

Американската Централна команда соопшти дека во саботата биле нападнати 140 ирански воени цели, од вкупно повеќе од 300 во текот на трите ноќи напади.

Според соопштението, целта на операцијата била да се намали способноста на Иран да напаѓа цивилни морнари и комерцијални бродови што се движат низ теснецот.

Иранските државни медиуми, во меѓувреме, објавија дека експлозии биле регистрирани во повеќе пристанишни градови.

Иран возврати со напади врз повеќе земји

Револуционерната гарда соопшти дека биле нападнати американски објекти и позиции во Јордан, Кувајт, Оман и Катар.

Катарската влада соопшти дека три лица, меѓу кои и едно дете, биле повредени од шрапнели. Обединетите Арапски Емирати, исто така, биле цел на ирански ракети и беспилотни летала, но нападот бил одбиен.

Во Јордан паднале три ракети и била предизвикана мала материјална штета, без човечки жртви. Локации во регионот Мусандам во Оман биле погодени со беспилотни летала, но не биле објавени информации за евентуални жртви и за обемот на штетата.

Еден индиски државјанин се води како исчезнат по нападот врз комерцијалниот брод „GFS Galaxy“ во близина на брегот на Оман. Од вкупно 11 индиски државјани што се наоѓале на бродот, десет биле спасени.