На вчерашната седница, Собранието на Република Македонија по скратена постапка го изгласа Предлог-законот за дополнување на Законот за безбедност на сообраќајот на патиштата, со кој се овозможува управување мотоцикли до 125 кубни сантиметри со возачка дозвола од Б категорија.
Предлогот, поднесен од пратеникот Павле Арсоски, доби широка поддршка и беше усвоен со 84 гласа „за“, без ниту еден глас против.
Со оваа измена, официјално се отвора ново поглавје за љубителите на мотоцикли, овозможувајќи полесен пристап до светот на две тркала.
Со измените на законот се предвидува возачите со Б категорија да можат да управуваат мотоцикли од категоријата А1 (до 125 см³), но под строго утврдени услови. Станува збор за мотоцикли со автоматски менувач, со работна зафатнина до 125 см³, сила до 11 kW и сооднос сила/маса до 0.1 kW/kg.
За да управувате ваков мотоцикл, потребно е:
– да имате најмалку 23 години
– да поседувате Б категорија најмалку 5 години
– да завршите 4-часовна теоретска обука во автошкола.
По завршување на обуката, автошколата издава потврда и го известува МВР, кое води евиденција.
Иако законот е донесен, ова правило сè уште не важи веднаш. Министерството за внатрешни работи треба во рок од 15 дена да ја утврди содржината на обуката, формата на потврдата и начинот на евиденција. Дури потоа ќе може практично да се применува.
Оваа измена се смета за значаен чекор, бидејќи на многумина ќе им овозможи полесен влез во светот на мотоциклите и стекнување искуство пред преминување на повисоки категории.