Како што соопшти Обвинителството, против осомничениот е донесена наредба за спроведување истрага за продолжени кривични дела силување на дете кое не наполнило 15 години и прикажување порнографски материјал на дете, предвидени во Кривичниот законик.
Според наводите во истрагата, осомничениот во периодот од 2023 година до 27 април 2026 година, на повеќе локации, принудувал на полов однос дете родено во 2012 година. Покрај тоа, тој го злоупотребувал детето и за снимање фотографии и видеозаписи со порнографска содржина.
Обвинителството наведува дека осомничениот му се заканувал на детето дека, доколку го пријави случајот или каже некому, снимениот материјал ќе го покаже на други лица.
Поради сериозноста на делото, опасноста од бегство, можноста за влијание врз сведоци и особено врз малолетната жртва, како и ризикот од повторување на делото, јавен обвинител до судијата на претходна постапка достави предлог за определување мерка притвор за осомничениот.