Две лица загинаа кога авион „цесна 210“ се урна во Мексико. Леталото се урна кратко по полетувањето од Националниот аеродром Пачука во сојузната држава Идалго, потврдија тамошните воздухопловни власти.
Според соопштението на Федералната агенција за цивилно воздухопловство на Мексико (AFAC), авионот со кој управувала компанијата Grupo Aeroespacial Avspace полетал во 9:30 часот по локално време кон Меѓународниот аеродром Куернавака во сојузната држава Морелос. Леталото се урнало само една минута по полетувањето, за време на почетното искачување, паѓајќи директно на авенијата Тезонтле во населбата Вента Приета. Местото на падот се наоѓа на околу 500 метри од прагот на пистата, надвор од самиот аеродромски комплекс.
Воздухопловната агенција објави дека двете лица во авионот го загубиле животот и дека веднаш е отворена административна истрага со цел точно да се утврди причината за несреќата. Екипи од управата на аеродромот Пачука веднаш излегле на терен за да ги спроведат утврдените процедури и да помогнат во координацијата на итните спасувачки служби.
Надлежните институции засега не ги соопштуваат идентитетите на загинатите, ниту какви биле нивните улоги во екипажот на авионот. Сè уште нема официјални показатели за евентуален технички проблем, за временските услови или за други неповолни фактори што би влијаеле на летот. Исто така, нема потврда дали при падот на улицата имало настрадани граѓани или оштетувања на објекти и возила.
Авионот од типот „цесна 210“ е едномоторно воздухопловно летало наменето претежно за приватна и општа цивилна авијација.