Стабилизирана ситуацијата со снегот, продолжува расчистувањето кон селата
Состојбата со снежните врнежи низ државата постепено се нормализира, а надлежните служби се на терен со цел целосно расчистување на патната инфраструктура, информираат од Центарот за управување со кризи.
Без струја во едно село, екипите на терен
Според официјалните информации, без електрична енергија моментално се жителите на селото Илино, во Општина Демир Хисар. Од ЕВН посочуваат дека нивни екипи веќе интервенираат на терен за отстранување на дефектот. Во исто време, патиштата што водат кон селските средини континуирано се чистат.
Планинските патишта во Кичевско сè уште под надзор
Во Општина Кичево, дел од патните правци кон планинските села сè уште се во фаза на расчистување, но се очекува тие да бидат целосно проодни во текот на денешниот ден. На регионалниот пат Крушево – Пуста Река е најавена интервенција во претпладневните часови, при што патниот правец во моментов е прооден за теренски возила и возила со соодветна зимска опрема.
Внимателно возење во источниот и североисточниот дел
Во Општина Виница, на повисоките населени места е забележана појава на голомразица, поради што се препорачува зголемена внимателност при возењето. Во Општина Ранковце, во рамки на Кумановскиот регион, во текот на денот се планирани активности за расчистување на патните правци кон селата Герман и Огут.