Петрушевски: Заев „ја омажи Македонија богато“, Филипче негира дека е загрозен македонскиот идентитет

Пратеникот на ВМРО-ДПМНЕ со остри критики кон СДСМ

Пратеникот на ВМРО-ДПМНЕ, Бране Петрушевски, на денешната прес-конференција упати остри обвинувања кон поранешниот министер за здравство Венко Филипче, тврдејќи дека тој не се разликува од поранешниот премиер Зоран Заев, туку претставува негова „надградена верзија“.

„Венко Филипче не само што не се разликува од Зоран Заев, туку е негова надградена верзија“, изјави Петрушевски.

Тој потсети на политичките ветувања од минатото и ги спореди со актуелните позиции на опозицијата.

„Заев ги излажа граѓаните дека не доаѓа на власт за да го смени името, туку бараше доверба од граѓаните, небаре да донесе правда и живот за сите во Македонија“, рече Петрушевски.

Обвинувања за прифаќање на бугарски позиции

Пратеникот продолжи со обвинувања дека Филипче, како што рече, поддржува политики што се спротивни на националните интереси.

„А Венко Филипче, не се крие дека сака да дојде на власт за да изврши национално предавство, да ги прифати и спроведе бугарските ултиматуми, на штета на македонскиот национален идентитет“, истакна тој.

Петрушевски додаде дека бугарските барања не се скриени, туку јавно изнесени.

„Бугарските власти не ги кријат нивните ставови и барања, тие сакаат македонската историја, јазик, култура, да се прогласат како дел од бугарската“, рече пратеникот.

Политички пораки и ставови за иднината

Тој оцени дека Филипче се поставува како политичка фигура која, според него, ги следи надворешните влијанија.

„И за тоа во Македонија си најдоа специјален пратеник, Венко Филипче, кој се претворил во пиун на Радев и е најгласен да се прифати бугарскиот наратив и Бугари во Устав“, изјави Петрушевски.

На крајот од прес-конференцијата, тој порача дека граѓаните очекуваат стабилност и европска интеграција без, како што рече, идентитетски отстапки.

„Граѓаните сакаат достоинствен и предвидлив евроинтегративен пат, со гаранции дека нема веќе да има барања за идентитетски отстапки. Тоа ВМРО-ДПМНЕ го слуша и заедно, во сојуз со народот, ќе се избориме за заслуженото место на масата во ЕУ“, истакна Петрушевски.