Активности спроведени во повеќе општини низ државата
Полициски службеници денеска спроведоа превентивни активности во повеќе општини низ државата. Акциите беа насочени кон намалување на ризикот од шумски пожари и пожари на отворен простор, како и кон подигнување на сообраќајната безбедност.
Полициски службеници од СВР Куманово, СВР Штип и Полициското одделение Чашка реализираа активности на подрачјата на општините Липково, Берово, Свети Николе, Пробиштип и Чашка. Притоа, граѓаните беа информирани за мерките за заштита од шумски пожари и пожари на отворен простор. Воедно, им беше укажано и на потребата од внимателност при извршување земјоделски работи.
На граѓаните им беше посочено дека е неопходна континуирана соработка со надлежните институции. Исто така, беше нагласена обврската навремено да се пријавува несовесно однесување. Тоа се однесува на фрлање и палење ѓубре, палење оган на отворен простор и во близина на шумски појаси, како и фрлање отпушоци. Целта е да се овозможи брза и навремена реакција.
Дополнително, граѓаните беа информирани дека предизвикувањето пожари претставува кривично дело и дека за тоа се предвидени законски санкции.
Возачите потсетени на обврските во сообраќајот
Полициски службеници од Полициското одделение за безбедност на патниот сообраќај при ОВР Кавадарци и ОВР Делчево реализираа превентивна активност во Кавадарци и Делчево на тема „Вози технички исправно возило“.
Во рамки на активноста беше нагласена обврската возилата редовно да се одржуваат технички исправни. Според полицијата, тоа е клучен предуслов за безбедно учество во сообраќајот.
Во Неготино, полициски службеници од Полициското одделение за безбедност на патниот сообраќај при ОВР Неготино реализираа превентивна активност на тема „Користи сигурносен појас“.
Притоа, беше истакната обврската за задолжително користење сигурносен појас во возилата. Воедно, беше укажано и на потребата од доследно почитување на сите сообраќајни правила и прописи. На возачите им беше посочено дека користењето сигурносен појас е законска обврска и за нив и за патниците, со цел зголемување на личната безбедност, соопшти МВР.
Полициски службеници од Одделението за превенција при СВР Скопје денеска во Скопје реализираа активности насочени кон возачите на мотоцикли, електрични тротинети и велосипеди. Притоа, тие беа потсетени на правилата и обврските за внимателно и одговорно учество во сообраќајот. Посебен акцент беше ставен на обврската за носење заштитен шлем.
Во Виница, превентивните активности беа насочени кон информирање на граѓаните за последиците од користење мобилен телефон додека управуваат возило. Во рамки на активностите беше поделен и печатен едукативен материјал.