Американскиот претседател Доналд Трамп повторно им вети финансиска помош на граѓаните на Соединетите Американски Држави. Тој најави дека секој Американец ќе добие по пет илјади долари доколку Републиканската партија извојува победа на претстојните конгресни избори закажани за 3 ноември.
Информацијата ја објави американската телевизиска мрежа „Еј-Би-Си“, пренесувајќи ги неговите пораки испратени до избирачите во текот на кампањата.
Ова се најважните избори во историјата. Републиканците имаат шанса да постигнат добар резултат. Можеби дури и многу добар.
Оваа порака ја испрати Трамп пред своите поддржувачи во Дејтона Бич во сојузната држава Флорида, откако претходно даде изјава и од Овалната соба. Најавата за директна финансиска исплата за секој граѓанин отвори серија прашања во јавноста во врска со правната законитост на ваквото ветување, како и за начинот на кој би се обезбедиле потребните буџетски средства за негова реализација.
Набргу по овие изјави, американскиот претседател ги ублажи своите настапи во јавноста во услови кога бележи ниско ниво на популарност предизвикано од растот на животните трошоци и актуелните тензии во односите со Иран.
Обично претседателот, без разлика дали е добар или лош, републиканец или демократ, губи на изборите на средината од својот мандат, кога се избираат сите членови на Претставничкиот дом и една третина од членовите на Сенатот.
На традиционалните избори на средината од мандатот, Демократската партија се надева на преземање на мнозинството во Претставничкиот дом и борба за контрола врз Сенатот. Според официјалните податоци, до вчера напладне 47,9 милиони американски граѓани веќе го искористиле своето право на глас преку законските процедури за предвремено гласање.