Беира Салифоска, позната како Беки, уште еднаш покажа дека со упорност, поддршка и силна волја можат да се поместуваат личните граници. Заедно со својот асистент, таа успешно истрча 21 километар на Wizz Air Скопскиот маратон.
Беира е лице со целосно оштетен вид од раѓање, а нејзиниот настап на полумаратонската дистанца претставува голем личен подвиг. Пред неколку години таа веќе беше дел од Скопскиот маратон, кога успешно ја заврши трката на 5 километри. Овојпат предизвикот беше повеќе од четирипати подолг.
„21 километар храброст, сила и инспирација! Денес нашата колешка Беира, заедно со својот асистент, успешно истрча 21 км на Wizz Air маратонот“, објавија од Државното училиште за деца и младинци со оштетен вид „Димитар Влахов“ – Скопје.
„Горди сме на тебе, Беира! Ти си вистинска инспирација“, порачаа од училиштето.
Ова не е првпат Беира да испишува лична и општествена приказна вредна за внимание. Таа е и првото лице со оштетен вид во земјава кое одбранило дипломска работа напишана на Брајово писмо.
Од академскиот успех до спортскиот предизвик од 21 километар, нејзината приказна е пример за истрајност и континуирано поместување на сопствените граници.
За Беира, полумаратонот не беше само трка и време на семафорот. Беше уште една цел што требаше да се достигне – чекор по чекор, километар по километар, со доверба во човекот покрај неа и со одлучност да стигне до целта.